Prishtina e pret Final Four-in

Pas kualifikimit të drejtpërdrejtë në Final Four të Ligës Ballkanike dhe triumfit në Kupën e Kosovës fundjavën e kaluar, drejtuesit e Sigal Prishtinës i kanë kthyer sytë drejt synimit të radhës, që është organizimi i Final Four-it të Ligës Ballkanike në Prishtinë.

Ekipi bardhekaltër veçse i ka filluar punimet në këtë drejtim, ndërsa zyrtarisht aplikimin pritet ta bëjnë nesër ose pasnesër.

Liga Ballkanike më parë kishte njoftuar se të gjitha skuadrat pjesëmarrëse në Final Four do të kenë të drejtë të aplikojnë që të jenë organizatore, kurse më 11 prill do të vendoset përfundimisht qyteti nikoqir i garës finale të BIBL.

Përveç Sigal Prishtinës, Final Four-in më parë e kishte siguruar edhe lideri i pjesës së rregullt të kampionatit, Galil Gilboa, ndërsa dy skuadrat të tjera pjesëmarrës do të përcaktohen nga fituesit e dueleve Levski - Kumanovo dhe Balkan - Teodo.