Prishtina njoftohet me humbjen

Seria prej 11 ndeshjeve pa humbje në të gjitha garat e këtij stinori të Sigal Prishtinës, ka përfunduar.

Skuadra maqedonase, Kozuv, ia ka shkaktuar humbjen e parë për sivjet prishtinasve, duke i mposhtur me rezultat 93-78.

Prishtina ishte rival i barabartë me maqedonasit vetëm në çerekun e parë, të cilën e përfunduan megjithatë në disavantazh prej 2 pikëve, 22-20.

Më pas, çdo minutë e kaluar në ndeshje e thellonte epërsinë e vendasve, duke arritur epërsinë më të thellë në çerekun e katërt, kur rezultat kishte dallim prej 18 pikësh, 84-66 dhe 86-68.

Dardan Berisha përsëri ishte koshashënuesi më i mirë i ndeshjes me 34 pikë të shënuara, prej tyre gjashtë trepikësha, mirëpo me një përqindje të dobët të efikasitetit nga loja (38%). Lojë të mirë tregoi edhe qendra Edin Bavcic që realizoi 19 pikë e 15 kërcime, kurse te pala fituese u dalluan Drasko Albijanic dhe Miladin Pekovic, që e përmbyllën takimin me nga 16 pikë.

Me këtë fitore, Kozuv tani bëhet skuadra e vetme pa humbje në grup, mirëpo Sigal Prishtina vazhdon ta mbaj kreun pasi ka një ndeshje më shumë të zhvilluar se sa ekipi nga Gjevgjelia.

Rezultatet dhe tabela aktuale.