Pse jo në Ligë të Kampionëve?

Kapiteni i skuadrës që po befason me rezultate këtë stinor në Premier Ligë, Mark Noble, ka thënë se ekipi i tij nuk ka asnjë presion për të arritur TOP 4-shen e ligës dhe pse jo, të sigurojnë edhe Ligën e Kampionëve!

Nën drejtimin e David Moyesit, West Ham United ka marrë një ecuri shumë të mirë të rezultateve, ndërsa ardhja e njeriut të harruar te Manchester Unitedi, Jesse Lingard, dhe shkëlqimi i tij te çekanët, ka bërë që skuadra të arrijë në katërshen kryesore të ligës.

“Kemi thënë 2-3 javë më parë, ne nuk kemi presion dhe nuk kemi ç‘të humbim. Secilën ndeshje po e marrim seriozisht dhe të shpresojmë të përzihemi te ekipet më të mira të ligës, e pse jo edhe të arrijmë Ligën e Kampionëve,” ka thënë ndër të tjera Noble, shkruan BBC Sport sot.

Ndërsa vetë trajneri i ekipit ka thënë se s’ka asnjë arsye pse mos të mbetet ekipi aty ku është aktualisht.

“Po dëgjojë analistë që po thonë se West Ham ka gjasa për Ligë të Kampionëve. Askush s’do ta parashikonte këtë në stinorin e kaluar, e as në fillim të stinorit. A mundemi? Ne do të luftojmë me secilin nga ekipet e forta të ligës deri në fund,” ka thënë skocezi Moyes.

Aktualisht çekanët e Londrës janë të katërtit në renditje, tetë xhiro pa përfunduar stinori. Janë katër pikë larg Leicesterit që është i treti, ndërsa kanë një pikë më shumë sesa Chelsea e tri më shumë sesa Tottenhami, që janë të renditur nën ta.