Qendra e re e Pejës!

Vetëm një ditë pas largimit të qendrës malaziase nga ekipi, Radomir Marojevic, Peja ka gjetur zgjidhje për vendin e lënë bosh. 

Fjala është për qendrën kroate Jozo Brkic, i cili pritet t’i bashkohet ekipit verdhezi së shpejti, bëjnë të ditur burime të Borozani.com. 

Brkic ka nënshtetësi kroate por edhe boshnjake, derisa së fundi ka djersitur fanellën e ekipit rumun, Timba nga Temishvari i Rumanisë. 

Peja ende nuk e ka zyrtarizuar lajmin, por kanë bërë të ditur për Borozani.com se janë në bisedime e sipër me lojtarin në fjalë. 

I lindur në Mostar të Bosnjës, qendra 211 centimetra e gjatë Brkic, ka qenë pjesë e rregullt e ekipit rumun gjatë këtij stinori. 

Ai ka pasur mesatare prej 11.4 pikëve për ndeshje, pastaj 6.8 kërcimeve si dhe 1 asistim. Brkic ka luajtur në të gjitha ndeshjet e ekipit të tij këtë stinor, derisa ka regjistruar 1 fitore dhe 4 disfata me ekipin e tij atje. 

Peja ka bilanc 6-1 nga cikli i parë i ndeshjeve në Superligë, me humbje vetëm nga Sigal Prishtina, derisa në Balkan League ka bilanc 2-2, me fitore si vendas dhe humbje si mysafir. 

Në xhiron e radhës në Superligë, Peja luan me Besën në derbin lokal të qytetit, derisa do të pushojë javën që vjen në BIBL, para ndeshjes me Kumanovën në dhjetor.