DEKLARATA E TRAJNERIT TË PEJËS
Radovic: Nuk ka energji për 40-minuta lojë
7 March, 2021 @23:26
Trajneri i ri i Pejës, Dragan Radovic, që ka luajtur sonte ndaj ish-ekipit të tij Prishtina, ka thënë se ekipi i tij nuk ka energji për 40-minuta lojë.
“Ne ia nisëm shumë mirë ndeshjes. Luajtëm mirë në mbrojtje dhe në sulm. Por më pas Prishtina kapi ritmin dhe na mposhti,” ka thënë fillimisht Radovic, “Prishtinës i dhamë mundësi për pikë të lehta dhe ata ecën drejt fitores. Këtë duhet ta përmirësojmë patjetër. Gjithashtu ne humbëm energjinë kah fundi i lojës, me sa pashë, s’kemi fuqi për 40-minuta lojë.”
Mirëpo, shpresat për Radovicin janë në ditët në vijim, pasi që pritet rikthimi i Dardan Berishës dhe Lis Shoshit në ekip.
“Po natyrisht, do të jetë mirë për ne. Nga Lisi nuk pres të bëj magji. Ai ka dy vite që s’ka luajtur. Duhet të përgatis trupin për lojë. Në anën tjetër Dardani është lojtari më i mirë i Kosovës. Natyrisht që është special dhe kthimi i tij na duhet shumë,” ka thënë malazezi, që këtë stinor muajin e kaluar fitoi Kupën e Kosovës me Prishtinën.
Në xhiron që vjen, Peja është mysafire e Rahovecit në Mizahir Isma.
