Rikthehet nga Belgjika dhe e dërgon Liburnin në ‘Main Round’

Në prag të ndeshjeve të fazës ‘Main Round’ në UEFA Futsal Cup, që Liburni i luan gjatë muajit tetor në Zagreb, ku pjesëmarrvse do të jenë 32 skuadrat më të mira të futsallit në Evropë, padyshim që duhet të përmendet edhe puna e mirë e bërë nga Bekim Bytyqi, trajneri i skuadrës gjakovare.

Bytyqi, dikur lojtari më i mirë i futsallit në Kosovë, për ta marrë drejtimin e Liburnit u rikthye nga Belgjika, aty ku veproi si lojtar e trajner për një kohë të gjatë, ndërsa si lojtar me skuadrën Ford Genk ishte pjesë e dy kampionateve botërore për klube, ku mori çmime ekipore e individuale.

Në një prononcim për Borozani.com, Bytyqi u shpreh që rikthimi i tij në Kosovë ishte për qëllimin e vetëm që ta drejtojë Liburnin drejt garave evropiane dhe të bëhet trajneri i parë që e dërgon një klub të Gjakovës në gara evropiane.

“Gjakova ka traditë të futsallit që afro 50 vite. Ky qytet ka pasur gjithmonë lojtarë që kanë qenë të talentuar në këtë sport dhe me përvojën e fituar në Belgjikë, doja ta drejtoja Liburnin drejt garave evropiane.

Qëllimi i parë u arrit, pra kalimi në ‘Main Round’, kurse tash na presin sfida edhe më të vështira ndaj skuadrave elitare evropiane.

Padyshim, qëllimi im nuk do të arrihej pa kryesinë e klubit dhe lojtarët, të cilët luftuan shumë dhe dhanë më shumë se 100% e tyre për t’ia sjellë këtë sukses qytetit të Gjakovës.” - u shpreh Bytyqi për Borozani.com

Kundërshtarët e Liburnit në ‘Main Round’ do të bëhen të ditur javëve të ardhshme.