Sekretari bëhet përkthyes, Kosova do të provojë fitoren

Konferenca për shtyp e Kosovës në Slloveni ka shkuar jo edhe aq mirë. Përkthyesja shqip-anglisht dështoi që në momentin e parë, duke mos gjetur termet e duhura futbollistike, prej ku fjalët e zëvendës-selektorit Muharrem Sahiti filloi t’i përkthejë sekretari i përgjithshëm i FFK-së, Eroll Salihu.

Pastaj, gjithçka shkoi në rregull, derisa Sahiti bëri me dije se Sllovenia është kundërshtare cilësore dhe kjo do të jetë ndeshja e parafundit e Kosovës në Ligë të Kombeve.

“Situata është jo-normale për shkak të pandemisë, ndërsa kemi mungesa të rëndësishme, e kur kësaj i shtohet edhe lëndimet dhe minutazha e vogël e disa futbollistëve në ekipe të tyre, do të provojmë të japim maksimumin,” ka thënë Sahiti, që po zëvendëson Bernard Challandesin që rezultoi pozitiv në COVID-19 pas ndeshjes miqësore me Shqipërinë, të cilën e ceki se nuk ka pasur nevojë të zhvillohet fare.

“E njohim kundërshtarin, kemi punuar për këtë ndeshje dhe do të provojmë fitoren. Formacionin mund ta ndryshojmë, por jo mënyrën e futbollit tonë,” ka thënë ndër të tjera Sahiti sot.

Sllovenia po kërkon vendin e parë në Grupin 3 të Ligës C të Kombeve, kualifikimin në Ligën B si dhe mundësinë për Botërorin Katari 2022. Ndërsa Kosova po lufton për mbijetesë.