Seria finale nis shpejt, ja formati

Sot është përcaktuar edhe termini i ndeshjes së parë të serisë finale të PlayOffit të Superligës.

Pas triumfeve ekspres të Prishtinës dhe Rahovecit ndaj rivalëve gjysmëfinal të tyre, Bashkimit dhe Yllit përkatëisht, tashmë nis seria finale.

Kështu, Prishtina të enjten duke filluar nga ora 19:00 (2 maj 2019) në Pallatin e Rinisë dhe të Sportit pret Rahovecin në duelin e parë final.

Seria finale luhet në formatin 1-1-1-1-1 ku përparësinë e terrenit vendas e ka Prishtina, pra sistemi vajtje-ardhje.

Shiko: SKEMËN E PLAYOFFIT

Ndërsa, përkundër se në Propozicion të Garave shkruan se këto duele duhet të luhen të dielën, të marten dhe të premten, seria do të fillojë të enjten.

Prishtina është duke kërkuar që të kurorëzojë stinorin historik në gara evropiane me titull kampioni të Kosovës, pas Kupës së fituar.

Ndërsa për Rahovecin kjo është hera e parë në histori të klubit që arrin finalen e PlayOffit dhe ekipi i Bujar Locit çkado që të arrijë në këtë seri, është sukses.

Përndryshe, si dëshmi se Prishtina dhe Rahoveci kanë qenë ekipet më të mira të stinorit është edhe fakti që të dyja kanë qenë finaliste të Kupës së Kosovës në mars të këtij viti.