Shtyhet Final Fouri i Kupës

Final Four i Kupës së Kosovës i paraparë që të zhvillohet këtë fundjavë është shtyer për fundjavën e ardhshme ka njoftuar Federata e Basketbollit të Kosovës, FBK, sonte. 

Kërkesën për shtyerje të turneut final e ka bërë organizatori, Ylli, derisa të njejtën gjë e kishte kërkuar edhe Sigal Prishtina për shkak se në mesjavën e ardhshme ka ndeshje të rëndësishme në kuadër të ligës ballkanike, shkruan faqja e FBK-së. 

Ylli, kërkon që të përgatitet sa më mirë për turneun final dhe pritet që të montojë tribuna teleskopike që do ta ngrisin kapacitetin e palestrës 13 qershori për 400 ulëse shtesë. Për t’i kryer këto punime, Yllit i nevojiten edhe një javë kohë shtesë, që është pranuar nga FBK. 

Kështu, datat e reja të Final Fourit të Kupës së Kosovës janë: 6, 7 dhe 8 mars 2015, derisa këtë fundjavë, luhen xhirot e radhës në Superligë, Ligë të Femrave dhe dy grupet e Ligës së Parë të Kosovës.