Sigal Prishtina fiton Kupën e Kosovës

Sigal Prishtina ka arritur të mbrojë trofeun e Kupës së Kosovës, duke e mposhtur Pejën në finale 77-66.

Një paraqitje brilante e Sigal Prishtinës në çerekun e fundit ka vendosur ndeshjen finale të Kupës së Kosovës në basketboll.

Përkundër se Peja luftoi gjatë tërë ndeshjes, sikur në çerekun e fundit atyre u ra tempoja e lojës, nga përgatitja fizike si duket, ndërsa bardhekaltërit çerekun e fundit e fituan me 30-12 për të shkrirë epërsinë 7 pikëshe të Pejës dhe të krijojnë avantazh për të çuar minutën e fundit qetë.

Me këtë, Sigal Prishtina ka fituar trofeun e 12 të Kupës së Kosovës, njashtu duke e mbrojtur Kupën e fituar vjet.

RRJEDHA E LOJËS

Ndeshja nisi me një epërsi të lehtë të Prishtinës, ndërsa Peja u kthye përmes Cameron Rundlesit për të përfunduar çerekun e parë 18-18.

Pasuan dy çerekë tjerë të favorshëm për Pejën, derisa Prishtina shënoi vetëm 21% të gjuajtjeve për tre, Peja shutoi me saktësi 47% në këtë kohë, për të hyrë në çerekun e fundit me 7 pikë epërsi.

Por, falë lojës brilante të amerikanit Fuquan Edwin, Sigal Prishtina ka fituar në mënyrë të merituar Kupën e Kosovës.

Edwin ka shënuar 23 pikë sonte dhe ka realizuar 10 kërcime, bashkë me 5 topa të vjedhura, prej të cilave 2 në momente vendimtare.

Atij i ndihmoi jashtëzakonisht edhe Drilon Hajrizi, që shënoi 17 pikë, derisa Jabarie Hinds, mbylli ndeshjen me 14 pikë të shënuara.

Te Peja, Cameron Rundles shënoi 21 pikë, ndërsa shutoi 5-15 për tre. 14 pikë të tjera shtoi Robert Abramovic, që bëri dallimin në çerek të dytë të ndeshjes, por më pastaj ai u ndal.

Sigal Prishtina

Peja