Sllovakia ia shkakton humbjen e parë Kosovës

Kombëtarja e Sllovakisë ka arritur të shënojë fitoren e dytë në Grupin 2 parakualifikues për në Botërorin 2023, duke ia shkaktuar Kosovës humbjen e parë në grup, 91-67 [21-9, 21-20, 20-13 dhe 29-25].

Sllovakia ka dominuar ndeshjen në të gjitha aspektet që nga fillimi i duelit, ndërsa Kosova nuk ka arritur t’i bëj ballë ekipit të drejtuar nga kroati Zan Tabak.

Paraqitja më e mirë e Kosovës ishte kur uli epërsinë e sllovakëve në 8 pikë përgjatë çerekut të tretë, por më tej s’arriti.

Sllovakia që nga fillimi i ndeshjes, kapi epërsinë fillestare 11-0 dhe nuk lejoi dardanët të shënojnë përgjatë 5 minutave të lojës - tregoi se do të jetë arrë e fortë.

Vladimir Brodziansky ka qenë më i miri te sllovakët duke shënuar 26 pikë e 12 kërcime në fitore, derisa janë dalluar edhe Tomas Pavelka me double-double prej 13 pikëve dhe 10 kërcimeve si dhe Mario Ihring që ka shënuar 14 pikë e 7 asistime.

Te Kosova Drilon Hajrizi luajti me 17 pikë, 6 asistime e 5 kërcime, kurse Erjon Kastrati me 14 pikë. 11 pikë të tjera shënoi Fisnik Rugova, derisa lojtarët tjerë nuk arritën të shënojnë pikë dyshifrore.

Selektori Christos Marmarinos u dha mundësi të gjithë lojtarëve të shijojnë lojën përveç Leonard Mekajt. Lojtari me efiçencë më të mirë te Kosova ishte Hajrizi, me 22, ndërsa efiçencë më negative kishte Morina, -3.

Pas kësaj ndeshjeje, Kosova ka bilans 2-1, njëjtë sikurse Sllovakia. 

TABELA AKTUALE:

1. Sllovakia 2-1
2. Islanda 2-1
3. Kosova 2-1
4. Luksemburgu 0-3