1/4: GJERMANIA - SPANJA
Foto: fiba.com
Spanja, gjysmëfinalistja e parë
12 September, 2017 @19:27
Spanja është gjysmëfinalistja e parë e EuroBasket2017!
‘Furia e kuqe’ nuk u ndal as nga Gjermania, në një takim i cili ishte tejet interesant gjatë pjesës së parë, mirëpo u mbyll në çerekun e tretë, çerek në të cilin spanjollët e treguan fuqinë e tyre dhe krijuan epërsinë që i çoi deri te fitorja me rezultat 72-84.
Rol kryesor në këtë fitore të Spanjës luajti Marc Gasol, i cili vetëm në çerekun e tretë të ndeshjes shënoi 18 pikë, ndërsa në total pati 28 pikë e 10 kërcime, duke qenë më i dalluari te Spanja sonte. Vëllau i madh, Pau Gasol, takimin e mbylli me 19 pikë të shënuara, derisa dyshja Gasol u ndihmua edhe nga Sergio Rodriguez me 11 pikë e 7 asistime.
Në anën tjetër, super paraqitja e Dennis Schroder me 27 pikë e 8 kërcime doli të ishte e pamjaftueshme për Gjermaninë, e cila megjithatë zhvilloi një paraqitje solide kur kemi parasysh fuqinë dhe kualitetet e spanjollëve.
Në gjysmëfinale, Spanja pret fituesin e duelit mes Sllovenisë e Letonisë, takim i cili zhvillohet sonte me fillim nga ora 20:30.
