THE FINALS

REUTERS

Spurs superior, një fitore larg titullit

13 June, 2014 @10:10

Shpirti ekipor i San Antonio Spurs po funksionon tejet mirë dhe tashmë ekipi nga Texasi është vetëm një fitore larg titullit (3-1 seria finale).

Loja e shpejtë dhe efikase

San Antonio Spurs ka arritur të shënojë edhe fitoren e tretë në serinë finale ndaj Miami Heat sot në mëngjesin e hershëm me kohën tonë.

Djelmoshat e Gregg Popovich kanë qenë ta pakapshëm në pjesën e parë të ndeshjes për ekipin nga Florida dhe kanë arritur një epërsi të konsiderueshme, prej gati 20 pikësh.

Miami përkundër se tentoi rikthimin në çerekun e tretë kur nga 21 pikët e ekipit 19 i shënoi LeBron James, këtë nuk e arriti. San Antonio me lojën e mrekullueshme ekipore, pasime të shpejta dhe saktësi të madhe në shënime, tashmë është larg titullit vetëm një fitore.

Kawhi Leonard ka shënuar më së shumti pikë për ekipin nga Texasi, 20 sosh, derisa 4 basketbollistë të tyre kanë arritur pikë dyshifrore në ndeshje.

Spurs arriti udhëheqjen maksimale prej 25 pikësh epërsi në disa momente dhe nuk la asnjëherë gjatë pjesës së dytë që epërsia e tyre të bie nën 10 pikë. Tony Parker shënoi 19 pikë në ndeshje, derisa Patty Mills nga banka ndihmoi me 14 pikë.

Titulli në shtëpi

“Jam tejet i lumtur me djelmoshat dhe lojën e treguar nga ata. Tashmë kemi përfunduar punë në Miami dhe do të kthehemi në shtëpi për të luajtur mirë ose edhe më mirë,” ka thënë trajneri i Spurs, Popovich, pas fitores që tashmë e ndan ekipin e tij nga titulli i pestë në histori të NBA-së.

Kjo ka qenë disfata e dytë rresht për Miamin në Play-Off, për herë të parë që nga finalet e Konferencës Lindore të vitit 2012.

“Ata kanë luajtur mrekullueshëm, derisa sinqerisht mund të them që asnjëri nga ne nuk e ka pritur një performancë të tillë nga ata. Ata ishin të mrekullueshëm. E kanë merituar plotësisht fitoren,” ka pranuar Erik Spoelstra, trajner i kampionit në fuqi, Miami Heat, disfatën e ekipit të tij.

Koshashënuesi më i mirë i Spurs, Leonard, përveç pikëve të shënuara është dalluar edhe me lojën e mirë në mbrojtje duke e ndalur Jamesin për ndeshjen e dytë me radhë.

Ndeshja e pestë e serisë zhvillohet në AT&T Center të San Antonios të dielën vonë me kohën tonë.