Suspendohet Drilon Hajrizi

Federata e Basketbollit të Kosovës (FBK) ka publikuar vendimin e Komisionit Disiplinor (KD) për Drilon Hajrizin, që ishte në futur në procedurë disiplinore pas ndeshjes Maqedonia-Kosova, në kuadër të para-kualifikimeve për Kampionatin Botëror Kina 2019.

“Drilon Hajrizi, lojtar i përfaqësueses A të Kosovës në basketboll, i shqiptohet masa disiplinore: ndalesë kohore i ushtrimit të aktivitetit basketbollistik në të gjitha aktivitetet e organizuara nga FBK në kohëzgjatje prej 6 (gjashtë) muajsh,” shkruan Vendimi i botuar sot nga FBK, të marrë nga Lulzim Fushtica, kryetar, Nuredin Ibishi, anëtar dhe Omer Daku, anëtar të KD-së.

SA DO TË MUNGOJË?

Hajrizi, që është pjesë e Sigal Prishtinës, kështu nuk do t’i ndihmojë ekipit të tij në gara të organizuara nga FBK (Superligë dhe Kupë) deri në mars 2018 si dhe nuk do të jetë pjesë e reprezentacionit në 4 përballjet e para kualifikuese për Kupën e Botës Kina 2019.

Sidoqoftë, bardhekaltërit kampionë mund të llogarisin te Hajrizi në FIBA Europe Cup, ndërsa reprezentacioni i Kosovës tek në ndeshjet e qershorit dhe korrikut (ndaj Hungarisë si vendas dhe Polonisë, gjithashtu si vendas).

Hajrizi ishte futur në disiplinore me kërkesë të selektorit të Kosovës Brad Greenberg, për shkak të sjelljeve të tij në përballjen Maqedonia-Kosova.

KD i FBK-së ka bërë të ditur se Hajrizi ka të drejtë ankesë në Komisionin Arbitrar në afat prej 3 ditësh të marrjes së këtij Vendimi.

Përndryshe, Hajrizi as mbrëmë në ndeshjen hapëse të xhiros së parë të Superligës për ekipin e tij, nuk ka qenë në lojë, por Sigal Prishtina mposhti pa probleme Bashkimin.