TOP 5-shja e javës në Superligë (8)

TopSporti.com ka zgjedhur më të mirët e xhiros së tetë në Superligën e Kosovës në basketboll.

Ekipin e javës e përbëjnë: Stevie Clark (Bashkimi), Malcolm Armstead (Peja), Arti Hajdari (Feronikeli), Justin Gray (Rahoveci) dhe Terik Bridgeman (Bashkimi).

Në ndeshjen hapëse të xhiros së tetë në Superligë, Bashkimi e mposhti Prishtinën me rezultat 95-89. Stevie Clark dhe Terik Bridgeman, luajtën rolet kryesore në fitoren e skuadrës prizrenase.

Clark luajti me 35 pikë, 6 asistime, 3 kërcime e 3 topa të rrëmbyer, derisa amerikani për herë të tretë rresht është duke u zgjedhur në TOP 5-shen e javës. Bridgeman luajti me double-double prej 16 pikëve e 10 kërcimeve, derisa i bëri edhe 2 asistime e 2 bllokada.

Fundi i ndeshjes në mes të Yllit dhe Pejës ishte dramatik. Fituesin e ndeshjes e caktoi fundori kosovar i natyralizuar Malcolm Armstead. Ai shënoi pikët vendimtare në sekondat e fundit të ndeshjes në fitoren e skuadrës pejane. Malcolm luajti me 16 pikë, 10 asistime, 6 kërcime e 2 topa të rrëmbyer.

Feronikeli e regjistroi fitoren e tretë në Superligë në ndeshjen kundër Trepçës. Më meritori në këtë fitore ishte Arti Hajdari. Ai nuk pushoi asnjë minutë, duke luajtur 40 minuta me 30 pikë, 5 kërcime, 5 topa të rrëmbyer dhe 4 asistime.

Rahoveci e mposhti skuadrën e Prizrenit me rezultat 90-75 dhe u vendos në krye të tabelës. Ndër më të dalluarit te vreshtarët ishte Justin Gray. Gray luajti me double-double prej 14 pikëve e 14 kërcimeve.