Vështirësohen punët pas humbjes nga Bullgaria

Përfaqësuesja e Kosovës sot është mposhtur edhe nga Bullgaria në kuadër të kualifikimeve për Eurobasket 2017.

Kjo ka qenë humbja e tretë me radhë e Kosovës në debutimin e saj dhe tashmë i rrezikohet edhe vendi i tretë në klasifikim, që dërgon në kualifikime për Kampionatin Botëror “Kina 2019”.

Starti i Kosovës ka qenë shumë i mirë sot, kur morrën epërsinë e vogël dhe e ruajtën atë në pjesën e parë, ku në fund të 20 minutëshit rezultati ishte 40-40.

Por në çerekun e tretë pasoi një rrufe bullgare, që shkatërroi çdo plan, ku çereku përfundoi 32-16.

Në çerekun e fundit, Bullgaria nuk lejoi që Kosova të shkëputet dhe ruajti epërsinë për të shënuar fitoren e parë në Grupin E.

TABELA AKTUALE DHE NDESHJET E RADHËS

Dardan Berisha me 18, Justin Doellman me 16 dhe Fisnik Rugova me 13 pikë kanë qenë më efikasit te Kosova, ndërsa mundi i kapitenit Edmond Azemi me tre treshe të njëpasnjëshme në fund, shkoi kot.

Te Bullgaria, A. Georgiev ka qenë i pandalshëm. Ai shënoi 28 pikë e 6 kërcime, ndërsa i ndihmuan edhe D. Bost me 18 pikë e 10 asistime, por edhe Hristo Zahariev me 15 pikë e 7 kërcime në fitoren e parë për vendin e tyre.

Pas kësaj ndeshjeje Kosova pret Slloveninë të shtunën në Mitrovicë, ndërsa Bullgaria luan ndaj Ukrainës.

Kosova tash ka bilanc 0-3, ndërsa Bullgaria 1-2.