Wade largohet nga Miami

Njëri ndër ikonat e Miami Heatit, Dwyane Wade, ka vendosur që të largohet nga Miami.

Pas aventurës 13 vjeçare me ekipin nga Florida, Wade arriti marrëveshje me Chicago Bullsin për dy vitet e ardhshme, ku do të fitojë 47.5 milionë dollarë.

Lajmin e konfirmoi edhe vetë lojtari duke shkruajtur një letër tifozëve të Miamit:

“Ky ka qenë një vendim jashtëzakonisht emocional dhe i vështirë për mua. E zgjodha të luaj për Chicago Bullsin, nuk ishte një vendim i lehtë por mendoj se ishte vendimi i duhur për mua dhe familjen time. Dua që ta falenderoj Miami Heatin, fansat, trajnerin dhe kryetarin. Ëndrra ime ishte që një ditë ta barti fanellën e Bullsit, ngase jam i lindur në Chicago, disa nga familjarët jetojnë ende në Chicago dhe jam shumë i lumtur që do të jem afër tyre.”

Bullsi për ta krijuar hapësirë Dwyane Wadet, ka larguar Jose Calderonin në Los Angeles Lakers dhe Mike Dunleavyn në Cleveland Cavaliers.

34 vjeçari Wade, gjatë karrierës së tij ka luajtur vetëm te Miami Heati dhe brenda 13 viteve arriti të bëhet kampion 3 herë me këtë skuadër.