Ylli largon dy të huaj

Skuadra e Yllit të Suharekës së fundi ka larguar të huajt e ekipit. Borozani.com ka mësuar se ekipi nuk ka qenë i kënaqur me performancat e treguara nga Duke Ezeamii, të cilit ia kanë ndërprerë kontratën.

Ndërsa basketbollisti tjetër, Eldin Camdzic, i cili u lëndua në përballje ndaj Bashkimit xhiro më parë, nuk do të mund të këndellet deri në muajin janar.

“Pas ekzaminimeve mjekësore është vërtetuar se Camdzic duhet të operohet dhe ekipi e ka liruar atë,” i është thënë Borozani.com sot.

Për më tepër, Ylli nuk e përjashton mundësinë e kthimit të Camdzicit pas shërimit të plotë, mirëpo deri atëherë ekipi do të shikojë tregun e lojtarëve dhe mund të sjellë përforcime të reja në skuadër.

Aktualisht nga të huajt te Ylli ka mbetur vetëm amerikani Malcolm Canada, derisa skuadra që drejtohet nga trajneri Beqir Berisha dhe ndihmësi Arbnor Rifati duket të jetë e kënaqur me forcat vendore.

Ylli aktualisht është në vend të pestë të Superligës dhe sipas mundësive po synon arritjen e Play-Offit në fund të stinorit të rregullt.