YLLI - BASHKIMI
Ylli shkëlqen ndaj Bashkimit
11 November, 2018 @18:47
Skuadra e Yllit ka shënuar fitoren e pestë të stinorit sonte, ndërsa ka mposhtur kampionin jo në formë Bashkimin, thellë 93-68.
Bashkimi ishte më i mirë se Ylli vetëm në çerekun e parë të ndeshjes, por pas kësaj pësoi keq.
Ekipi suharekas ndali ekipin kampion në vetëm tre pikë në çerek të dytë, 26-3, ndërsa të tretin e fitoi 31-21 për të përfunduar duelin 93-68 në të mirë të tyre.
Robert Jones ka shënuar 32 pikë e 12 kërcime në fitore, ndërsa Terrell Everet ka dhënë 17 pikë e 14 asistime në përballje ku Arben Krasniqi provoi gjithçka në çerekun e fundit dhe i dha mundësi edhe të rinjve si Getoar Arifaj, Ardit Pepaj (3p), Drilon Shala (2p) dhe Flori Gashi.
Te Bashkimi, në humbjen që duhet harruar shpejt më efikasi ka qenë si zakonisht Jordan Capps me 25 pikë, ndërsa Ujkan Karanezi ka shtuar 16 pikë tjera e 11 kërcime.
Pas këtij dueli, Ylli ka bilanc 5-3, ndërsa Bashkimi 3-5. Në xhiron që vjen, Bashkimi pret Rahovecin, ndërsa Ylli Trepçën.
