YLLI - LIPJANI
Ylli shkëlqen për fitore në pjesë të dytë
12 December, 2018 @20:33
Një pjesë e parë e befasishme me lojë të mirë të Lipjanit, la Yllin në disavantazh minimal pas 20 minutave lojë, 46-47.
Mirëpo, krejt tjetër muhabet ka qenë pjesa e dytë e ndeshjes, kur të përzgjedhurit e Arben Krasniqit janë këndellur tërësisht dhe kanë marshuar sigurt drejt fitores së tetë në Superligë, 105-83.
Kjo ka qenë ndeshja e tretë e fituar e Yllit në Superligë me mbi 100 pikë të shënuara, ndërsa më efikasi në këtë fitore ka qenë Robert Jones III me 24 pikë.
Përveç Jonesit, me nga 18 pikë të shënuara janë dalluar edhe forcat vendore të suharekasve, Artin Gashi dhe Egzon Kuqi, derisa një numër i jashtëzakonshëm i asistimeve është regjistruar nga Leonard Mekaj, 20!
Te Lipjani 33 pikët e Fisnik Junikut nuk mjaftuan për befasi, derisa pikë dyshifrore shënuan edhe Alex Dubovitsky dhe Musab Mala, 16 përkatësisht, 13.
Me këtë fitore Ylli çon bilancin në 8-5, ndërsa Lipjani mbetet i fundit me 2-11.
