3 suspendime dhe gjoba për rrahje në Ligën e Dytë

Përballja e Ligës së Dytë të Kosovës në basketboll, ndërmjet United Basketball dhe Llapit kaloi me fitoren e ekipit gjilanas, 107-65.

Mirëpo, për shkak të një rrahjeje ndërmjet disa lojtarëve, Komesari i Garave ka gjobitur akterët dhe i ka suspenduar ata si mëposhtë:

Rinor Emërllahu, (KB United) - 200 euro gjobë dhe 2 ndeshje moslojë.
Egzon Hyseni, (KB United) - 500 euro dhe 4 ndeshje moslojë.
Artin Muçiqi, (KB Llapi) - 500 euro dhe 4 ndeshje moslojë.

Ndërsa ngjarja është përshkruar kështu në Informatorin Nr 3 të Ligës së Dytë:

“Pas një fauli të gjykuar nga ana e gjyqtarëve ndaj lojtarit të KB Llapi, Artin Muçiqi, i njejti sulmon fizikisht, godet me grusht, lojtarin e KB United Basketball, Rinor Emërllahu, e ky i fundit menjëherë ia kthen goditjen Muçiqit.

Pastaj, nga banka e KB United Basketball, lojtari Egzon Hyseni, hynë në fushë të lojës dhe sulmon fizikisht lojtarin e KB Llapi, Artin Muçiqi.

Gjyqtari ka diskualifikuar Emërllahun, Hysenin e Muçiqin pas këtij rasti në këtë ndeshje.”

Sa i përket bilancit sportiv në këtë duel, United Basketball ka bilanc prej dy fitoreve dhe një humbjeje pas tre xhirove të para, ndërsa Llapi ka tre humbje nga po aq ndeshje, duke qenë e fundit në renditjen tabelare.