TREPÇA '89 - TREPÇA
5 me radhë, lideri fiton derbin
19 March, 2017 @15:59
Pak ditë pas ndeshjes së Kupës, ndeshje e cila befasisht u mbyll me fitoren e Trepçës dhe eliminimin e ‘89shit, lideri aktual i Superligës i është revanshuar rivalit të qytetit në ndeshjen e luajtur në kuadër të Ligës.
Skuadra e Trepçës ‘89 forcën e vet e filloi që në fillim, me epërsinë që erdhi qysh në minutën e 8’, moment në të cilin Fiton Hajdari shënoi për 1-0. Dominimi vazhdoi edhe më tutje, ndërsa pjesa e parë u mbyll 3-0 pas golave të Shpëtim Idrizit për 2-0 dhe Oto Johnit për 3-0.
Në pjesën e dytë, lideri aktual shënoi edhe 3 herë të tjera përmes Florent Hasanit (2) dhe Rron Brojës, derisa golin e nderit për Trepçën e shënoi Enis Zabërxha në minutën e 71’.
I vetmi shqetësim për liderin nga ky takim është lëndimi i Shpëtim Idrizit, lëndim i cili ndodhi në fundin e pjesës së parë.
Kjo fitore është e pesta me radhë për ‘89shin në pranverë, kurse e shtata me radhë nëse marrim edhe ndeshjet e stinorit vjeshtor. Në anën tjetër, kjo humbje ia komplikon edhe më tepër punët Trepçës në luftën për mbijetesë.
