SEZAI SURROI
BOROZANI
Bashkimi e pret Pejën të mërkurën
20 April, 2015 @22:14
Pas humbjes së thellë në ndeshjen e parë gjysmëfinale të Play-Offit ndaj Pejës, Bashkimi kërkon ndonjë mundësi që të barazojë rezultatin në 1-1.
Ekipi prizrenas pret verdhezinjtë e Pejës të mërkurën mbrëma në palestrën Sezai Surroi të Prizrenit, derisa pas kësaj, edhe një ndeshje tjetër gjysmëfinale do të zhvillohet në Prizren, pasi që sistemi i garave të gjysmëfinaleve të Play-Offit ka ndryshuar kësaj radhe në 1-2-2.
Ndeshja e parë kaloi plotësisht në dominim të Pejës dhe Boris Kurtovic përdori thuajse të gjithë lojtarët që kishte në dispozicion për të treguar forcën ndaj Bashkimit, ku këta të fundit as që iu afruan fitores.
Alban Veseli, Drilon Hajrizi dhe Fisnik Rugova ishin basketbollistët më efikas të Pejës në ndeshjen e parë të cilën verdhezinjtë e fituan me 28 pikë dallim për të marrë epërsinë 1-0 në seri.
Te Bashkimi më të dalluarit ishin Mark Dawson dhe Qëndrim Biraj. Ekipi i drejtuar nga Edin Kërveshi, asnjëherë gjatë stinorit nuk ka arritur të mposht Pejën, duke përfunduar stinorin me katër humbje nga verdhezinjtë.
Se a do të jenë në gjendje prizrenasit të befasojnë Pejën në mërkurën mbrëma në Sezai Surroi, duket vështirë, sidoqoftë, duke ditur se i kanë dy ndeshje si vendas, mund të shpresojnë në befasi.
