BESA - HAJVALIA
Borozani/ A.P
Besa rendit fitoret, Hajvalia fundoset
8 March, 2017 @14:56
Në takimin e luajtur sot mes Besës e Hajvalisë në Pejë, skuadra vendase ka shënuar fitore të lehtë, për ta vazhduar kështu serinë e fitoreve në stinorin pranveror. Në 3 ndeshjet e luajtura pas pushimit në Superligë, Besa ka 3 fitore.
Takimi u dominua plotësisht nga pejanët, ndërsa fituesi u vulos brenda 45 minutave të para. Fillimisht epërsia e vendasve erdhi nga goli i prizrenasit Fatih Karahoda, ndërsa me 2 golat e Fisnik Papuqit në fundin e pjesës së parë, dilema e fituesit u mbyll dhe pjesa e mbetur e ndeshjes u zhvillua vetëm për statistika. Kur ndeshja veçse ishte e mbyllur, Besa e gjeti edhe golin e katërt, me Leart Eminin që shënoi për 4-0.
Përkundër fitores, Besa mbetet edhe më tutje larg skuadrave që luftojnë për titull, derisa qëllimi kryesor i klubit pejan mbetet triumfi në Kupën e Kosovës. Në anën tjetër, kjo humbje e fundos edhe më tepër Hajvalinë, të cilës i zvogëlohen gjithnjë e më tepër shpresat për mbijetesë në elitën e futbollit kosovar.
