Bylbyl Sokoli rikthehet te Drenica, si trajner-deputet!

I shkarkuar nga FC Drenica në momentin kur vendosi të hyjë në garë zgjedhore për parlamentin e Kosovës, Bylbyl Sokoli, sot është zyrtarizuar si trajner i ri i Drenicës! Sokoli është rikthyer në postin e kryetrajnerit të ekipit, pasi që skuadra kuqezi nga Skenderaji ndau rrugët dje me Arsim Thaçin.

Largimi i Thaçit nga detyra erdhi pas disfatës së Drenicës në “Bajram Aliu” nga Trepça’89, që ngushtoi diferencën e pikëve në krye të renditjes tabelare në Grupin A të Ligës së Parë.

“Pas ndryshimeve në stafin drejtues, klubi ka arritur marrëveshje me trajnerin e ri që do ta udhëheqë ekipin në pjesën e mbetur të sezonit.
Bylbyl Sokoli, trajneri me përvojë të madhe në futbollin kosovar, zyrtarisht është emëruar si kryetrajner i ri i skuadrës.
Me një histori të pasur në zhvillimin e futbollit dhe drejtimin e skuadrave të njohura, besojmë se përvoja dhe vizioni i Sokolit do të jenë vendimtare për të ndihmuar klubin të arrijë objektivat e tij,” — ka bërë të ditur FC Drenica sot në njoftim.

Drenica po kërkon që të bëhet pjesë e Superligës në stinorin tjetër dhe ka pasur diferencë edhe më të madhe të pikëve gjatë stinorit. Por, ekipi në fjalë ka pësuar dy herë nga ‘89-shi i Shpëtim Idrizit në pjesën pranverore të stinorit, si në “Riza Lushta” ashtu edhe në “Bajram Aliu” së fundi, kur u mposhtë 0-2!

Tash Drenica ka vetëm 4 pikë më shumë sesa Trepça’89 që është e dyta! Drenica udhëheq Grupin A të Ligës së Parë me 41 pikë, derisa mitrovicasit kanë 37. Gara për pozitën e parë në Grupin A të Ligës së Parë është e ashpër, pasi që pos dy skuadrave, afër me pikë janë edhe Vëllaznimi (36), Liria (36) dhe Trepça (34).

Sokoli 66-vjeçar, që mori mbi 18 mijë vota për parlament dhe do të bëhet deputet i ardhshëm i parlamentit të Kosovës, pritet të debutojë në bankën e drenicakëve fundjavën që vjen në përballje ndaj Lirisë në “Përparim Thaçi”. Aty, Drenica pikërisht nën drejtimin e Sokolit kishte pësuar humbjen e parë sezonale 24/25!

Kujtojmë, ky është trajneri i katërt i Drenicës këtë stinor. Ekipi kuqezi nisi stinorin me Megzon Visokën, e ndërroi atë për Bylbyl Sokolin. E largoi këtë të fundit para fundit të vitit të kaluar, për ta emëruar Arsim Thaçin në krye. Tash, përsëri emëroi Sokolin si kryetrajner, kur kanë mbetur edhe shtatë xhiro deri në fund të stinorit.