SHPRESË PËR MBIJETESË!
Mitrovica befason Besën, vazhdon shpresën!
31 March, 2025 @20:59
Fitorja e parë pas shtatë muajve për Mitrovicën, e para në pranverë, e dyta në gjithë stinorin dhe si vendas, i ka dhënë shpresë ekipit! Skuadra që po debuton këtë stinor në Ligë të Parë, ka marrë tri pikë shprese sot, duke befasuar Besa Pejën në shtëpi.
Mitrovica, pas pjesës së parë pa gola, në pjesë të dytë ka gjetur golin përmes Taulant Avdylit për të fituar ndeshjen, Mitrovica - Besa Peja 1-0 [Taulant Avdyli 77’]. Ky ka qenë triumfi i parë i ekipit të tretë mitrovicas në Ligë të Parë - Grupi A, që prej 1 shtatorit të vitit të kaluar, kur me të njëjtin rezultat kishin mposhtur Rilindjen 1974, në xhiron e tretë kampionale.
Mitrovica vazhdon të jetë e fundit në tabelë, në pozitën e dhjetë, me 11 pikë nga 20 ndeshje. Por tash ka 8 pikë më pak sesa pozita që ua shpëton stinorin! Lufta pritet të jetë e ashpër në shtatë xhirot e mbetura të Ligës së Parë - Grupi A! Besa Peja në anën tjetër ka pësuar humbjen e tetë sezonale dhe mbyllë xhiron e njëzetë në pozitë të gjashtë me 24 pikë, aty edhe ku ishte në të kaluarën.
