DRENICA KËRKON TRAJNER TË RI

Foto: FCDrenica/ fb
Drenica vihet në kërkim të trajnerit të katërt për këtë stinor!
1 April, 2025 @16:49
Humbja nga Trepça’89 duket se është përjetuar rëndë te ekipi i Drenicës! Pas disfatës së pësuar dje nga rivali që duket të jetë i madh në luftë për Superligë, Drenica ka marrë vendim, siç ka thënë, jo të lehtë, duke liruar nga detyra trajnerin Arsim Thaçi!
Duke falenderuar për punën, Drenica ka bërë të ditur se ka liruar nga detyra Thaçin ndërsa ka shtuar se shpejt do të emërojë trajnerin e ri që do t’i udhëheq në xhirot e mbetura kampionale. Drenica përndryshe është e para në renditjen tabelare të Grupit A në Ligë të Parë (pozitë kjo që siguron Superligën direkt).
“FC Drenica njofton se ka marrë vendim të liroj nga detyra trajnerin Arsim Thaçi. Ky vendim është marrë pas një analize të detajuar të ecurisë së ekipit dhe nevojës për ndryshime që do të ndihmojnë në arritjen e objektivave tona për të ardhmen.
Vendim nuk ka qenë i lehtë, por është marrë pas një analize të thellë të situatës dhe përpjekjës për të ecur përpara me një qasje të re me qëllim që klubi të arrijë rezultate sa më të mira.
Klubi tashmë ka nisur procesin për gjetjen e një trajneri të ri, i cili do të marrë përsipër drejtimin e skuadrës dhe do të punojë për të përmbushur synimet tona.
Falënderojmë trajnerin Arsim Thaçi për punën dhe përkushtimin e tij gjatë kohës së kaluar me ekipin dhe i urojmë suksese në të ardhmen,” - ka shkruar FC Drenica në njoftim.
Kuqezinjtë nga Skenderaji nisën stinorin me Megzon Visokën, për ta vazhduar më pas me Bylbyl Sokolin. Së fundi, prej pjesës së dytë të stinorit timonin e ekipit e mori Thaçi! Duke ditur rëndësitë e ndeshjeve të fundit të stinorit kur kanë mbetur edhe shtatë xhiro deri në fund, Drenica ka vendosur që të kërkojë trajner të ri - të katërtin për këtë stinor!
Ekipi nga “Bajram Aliu” në shtatë xhirot e fundit ka tre duele direkte me ekipet që po synojnë dy vendet e para të tabelës (e para dërgon në Superligë direkt, e dyta mundëson ndeshje shtesë përmes dy barazheve).
DUELET E DRENICËS:
Liria - Drenica
Drenica - Trepça
Vëllaznimi - Drenica
Drenica - Besa Peja
Rilindja 1974 - Drenica
Drenica - Istogu
Rahoveci - Drenica.