Çereku i fundit 31-7, për të arritur finalen: Vllaznia - Goga Basket

Vllaznia e Shkodrës dhe Goga Basket e Tiranës sonte do të përcaktojnë fituesin e Kupës së Shqipërisë në basketboll.

Dy skuadrat, në gjysmëfinalet e djeshme të zhvilluara në Feti Borova të Tiranës kanë fituar ndaj kundërshtarëve të tyre.

Derisa Goga Basket kaloi më lehtë Tiranën duke e mposhtur me 21 pikë dallim 109-85, Vllaznisë iu desht luftë shumë më e madhe ndaj Teutës së Durrësit për të arritur finalen.

Shkodranët duke bërë rikthim të madh në lojë dhe me mbrojtje brilante në çerekun e fundit kanë arritur të fitojnë 83-80 ndaj durrësakëve.

E rezultati i çerekut të fundit, ka qenë 31-7 në të mirë të Vllaznisë, një mrekulli e madhe, e fituar pas një lufte për çdo top dhe mbrojtjeje fenomenale në këtë duel. Çereku i tretë i ndeshjes ishte mbyllur me rezultat 73-52 në të mirë të Teutës!

Finalja mes dy skuadrave fituese gjysmëfinaliste, Vllaznisë dhe Gogës zhvillohet në pasditen e sotme në Feti Borova të Tiranës me fillim prej orës 17:00, ku fituesi do të çojë lartë Kupën e Shqipërisë për sezonin 2019/20.