Çka po ndodh me Trepçën?!

Trepça assesi nuk po mund të rehatohet me përforcimet e huaja. Kampionët sot kanë vendosur që t’i largojnë dy kanadezët, Keaton Cole dhe Paul Campbell, pasi që klubi nuk ka qenë i kënaqur me cilësitë e tyre.

6 lojtarë të huaj janë larguar nga Trepça deri më tani!

Me Cole-in dhe Campbell-in numri i basketbollistëve të huaj të larguar nga Trepça arrin në gjashtë këtë stinor, megjithëse deri më tani janë zhvilluar vetëm 8 xhiro në BKT Superligë. Xehetarët më parë i kishin provuar edhe basketbollistët Rickey Young, Milan Kolovrat, Zeljko Egeriç dhe Vincent Simpson, por në fund të gjithë e kishin fatin e njëjtë.

Në vend të dyshes kanadeze, nga burime jozyrtare thuhet se Trepça gjatë javës pritet që ta angazhojë plejmekerin Jerome LaGrange dhe qendrën Dennis Mims.

LaGrange është 190 centimetra i gjatë dhe stinorin e kaluar ka luajtur në skuadrën rumune, Mobitelco. Plejmekeri 34 vjeçar më parë ka luajtur edhe në skuadra të ndryshme të Hungarisë, Bosnjës, Serbisë dhe shtete të ndyrshme europiane.

Ndërsa Mims, ka luajtur një kohë të gjatë me skuadra të ndryshme të ligës elite të Turqisë, ku në veçanti bie në sy angazhimi i tij në Besiktas, ekip ky që sivjet garon në Euroleague, mirëpo aventura e tij në klubin bardhezi nuk zgjati shumë pasi që u largua në gjysmë të stinorit. Qendra 205 centimetra së fundi ka luajtur në Gjermani me skuadrën Duesseldorf.

Tani mitrovicasit janë duke shpresuar që të kenë fat te përforcimet e huaja dhe këta dy basketbollistë t’i përmbushin pritjet e trajnerit Neven Plantak dhe të jenë të qëndrueshëm në Minatori.