Derbi në Prizren, sonte

Kampionja aktuale e Kosovës në basketboll,  Trepça, assessi të këndellet këtë stinor. Ekipi që nuk i bënte hesap kundërshtarët e tij në stinorin e kaluar këtë stinor po has në vështirësi të mëdha për të arritur fitore në kuadër të katërshes së madhe.

E së fundi edhe humbja nga RTV 21, debutuesi në BKT Superligë, ishte edhe më e rëndë. Mitrovicasit tashmë kanë larguar trajnerin kroat, Neven Plantak dhe po udhëhiqen nga forcat vendore me Izet Tahirin në krye.

Driloni ende vuan nga lëndimi

Sonte, ata do të udhëtojnë për në Prizren, ku në palestrën Sezai Surroi do të ndeshen ndaj Bashkimit.

Mungesat te mitrovicasit janë evidente nga lëndimet, te të cilat më së shumti po ndikon i ftohti që po mbretëron në palestra që vuajnë për ngrohje adekuate.

“Lëndimi im nuk është i lehtë për t’u tejkaluar. Posaçërisht në këtë të ftohtë. Kam probleme edhe me muskujt e shpinës,” ka thënë për portalin tonë lojtari më i mirë i Trepçës në stinorin e kaluar, Drilon Hajrizi, i cili do të jetë hendikepi më i madh i të gjelbërve sonte.

“Fikret Hadzic, Valdrin Haxhiu, Imer Tahiri dhe qendra amerikane Denis Mimms janë të tjerët që do të mungojnë sonte,” ka shtuar Kemajl Muja, zyrtar i Trepçës mbrëmë në Interaktiv.

Rasti i stinorit për Bashkimin

E Bashkimi, i cili stinorin e kaluar nuk arrinte t’i bëj ballë Trepçës, ka rastin esencial që të shënojë fitoren e dytë të stinorit ndaj kampionëve, për të siguruar vendin e tretë në tabelë dhe sado-kudo t’u jep moral për ndeshjet tjera derbi.

Bashkimi mposhti Trepçën si mysafir në ndeshjen e parë të luajtur në Pejë, pasi që Trepça e ka palestrën në renovim. Prizrenasit janë të kompletuar dhe nuk është raportuar për asnjë lëndim.

XHIRO XIII

Sot: 14:00/ Vëllaznimi – Sigal Prishtina (0-1) 19:00/ Bashkimi – Trepça (1-0) Nesër: 18:00/ Kosova – RTV 21 (0-1) 18:00/ Drita - Peja (0-1) Në kllapa janë të shënuara fitoret në duelet e ndërsjella të ekipeve që takohen këtë fundjavë