BEFASIA KA MOTO
Më të mirë pa përforcime!
14 December, 2012 @9:42
Njëri ndër basketbollistët më të mirë të Kosovës së Vushtrrisë, Besmir Nuli, i gëzuar nga fitorja e parë dhe i ngrirë nga i ftohti në palestrën Jeton Tërstena të Vushtrrisë, pas fitores së mbrëmshme ndaj Dritës është shprehur për Borozani.com se fitorja e tyre ka ardh pas angazhimit maksimal të tyre.
“Jemi përgatitur tërë javën për këtë ndeshje. Jemi munduar shumë për fitore dhe kemi dhënë maksimumin,” ka thënë i entuziazmuar ai pas fitores së parë të stinorit.
Kosova e Vushtrrisë, e cila pas largimit të Jeremey Jackson ka mbetur edhe pa të huajin e dytë, Calvin Lee, ka qenë më kompakte në ndeshje, mendon Nuli.
“Tashmë pa asnjë përforcim, ndoshta jemi edhe më të mirë, pasi që të gjithë luajmë për njërin dhe njëri për të gjithë. Besoj që kjo ka qenë edhe aryseja pse e merituam fitoren,” ka shtuar Nuli 21 vjeçar i cili ka kaluar nga ekipi kampion Trepça në ekipin vushtrrias.
Festim Fejzullahu me 24 pikë si dhe Xhevdet Ademi me 22 të tjera kanë qenë koshashënuesit më të dalluar në ndeshjen e mbrëmshme ku vushtrriasit mposhtën Dritën.
