Dy treshe në 20sek e fundit, Bashkimi fiton në vazhdime derbin lokal

Edhe pse Prizreni hyri në çerekun e fundit me nëntë pikë epërsi, Bashkimi mrekullisht ka arritur që të çojë ndeshjen në vazhdime dhe të fitojë derbin e qytetit.

Kanë qenë treshet e Musab Malës dhe Terik Bridgemanit në 17 sekondat e fundit të ndeshjes, që kanë barazuar rezultatin, ndërsa në anën tjetër Urim Zenelaj nuk ka arritur të shfrytëzojë rastin e artë për fitore me gjuajtjet e lira që i kishte, duke mos e shënuar asnjërën.

Dueli shkoi në vazhdime me rezultatin 86-86, ndërsa në 5 minutat shtesë Bashkimi dukshëm më me motiv dhe me 5 pikët e shpejta të Bridgemanit ka krijuar epërsinë që çoi më pas në fitore 101-92 për ekipin e Illmen Bajrës.

TABELA AKTUALE

Stevie Clark ka qenë më efikasi te Bashkimi në fitoren e madhe të derbit, duke shënuar 33 pikë, 7 kërcime e 5 asistime.

24 të tjera i shtoi Bridgeman, që kontribuoi edhe me 9 kërcime tjera në fitore. Mala kreu ndeshjen me 8 pikë, prej të cilave dy treshe, e njëra vendimtare për shpresë ekipore.

Te Prizreni 32 pikët e Ty Nicholsit, që shtoi edhe 10 kërcime e 6 asistime në llogari të tij nuk mjaftuan. Darial Franklin dha 24 pikë, ndërsa double-double i Urim Zenelajt s’doli mjaft (11 pikë + 18 kërcime).

Me këtë fitore Bashkimi bën bilansin 13-8 pas 21 ndeshjeve të zhvilluara, kurse Prizreni 13-9 me 22 ndeshje.