Erling Haaland nënshkruan kontratë një dekadëshe me Manchester Cityn!

Sulmuesi norvegjez, Erling Haaland, ka nënshkruar kontratë 10 vjeçare me Manchester Cityn. Kampioni aktual i Premier Ligës ka bërë të ditur sot se Haaland 24 vjeçar, pas 2.5 viteve të para të jashtëzakonshme, ka pranuar dhe ka nënshkruar kontratën që do ta mbajë në klub edhe për një dekadë.

Sipas mediave britanike, norvegjezi do të pagohet 500 mijë funta në javë - rekord shifër kjo, në kontratën që ka afat deri më qershor të vitit 2034. Shifra e golave të tij për Cityn prej se arriti aty nga Borussia Dortmund në vitin 2022 janë mbresëlënëse, 111 gola në 126 ndeshje!

“Jam me të vërtetë i lumtur që kam nënshkruar kontratë të re me klubin dhe i gëzuar që do të kalojë kohë ende në këtë klub të madh. Manchester City është klub special me njerëz fantastik përreth dhe tifozë të jashtëzakonshëm, që nxjerrin më të mirën nga secili,” ka thënë ndër të tjera sulmuesi i Norvegjisë.

Haaland ka pasur karrierë që e ngriti shpejtë. Pas dy stinorëve të kaluar te Molde, ai arriti te Salzburgu ku shkëlqeu në 2019/20. Prej aty, u transferua te Borussia Dortmund (67 ndeshje, 62 gola) 2020-22 dhe prej vitit 2022 është te Manchester City.

Përndryshe, ai në fund të vitit të kaluar ka thyer edhe rekordin e Norvegjisë duke u bërë golashënuesi më i mirë në histori të vendit të tij në moshën 24 vjeçare, duke shënuar 38 gola me reprezentacionin skandinav.