Vetëm 6 muaj i zgjati aventura në Londër!

Skuadra nga kryeqyteti i Anglisë, West Ham United ka bërë të ditur se ka ndarë rrugët me trajnerin spanjoll të ekipit, Julen Lopetegui. Trajneri 58 vjeç u emërua si timonier i klubit londinez në maj të vitit 2024 dhe pas gjashtë muajsh pune të plotë, ai pa veten të shkarkuar nga detyra.

Lopetegui zëvendësoi skocezin David Moyes në detyrë të trajnerit të West Ham Unitedit. Ekipi i çekanëve nuk po përjeton stinor të mirë në Premier Ligë, ndërsa ekipi ka fituar gjashtë ndeshje!

Trajneri që nisi punën zyrtarisht më 1 korrik 2024 përjetoi humbjen e nëntë në 20 ndeshje të këtij stinori, kur u mposhtë nga Manchester City në fundjavën që e lamë pas! West Ham United është i 14-ti në renditjen tabelare me vetëm 7 pikë mbi zonën e rënies! Graham Potter është emri i përfolur fillimisht si zëvendësues potencial i tij.