Euforia, armiku më i madh

Trajneri i Trepçës’89, Zekirija Ramadani, pas fitores së madhe të shënuar ndaj Besës në Pejë, që ka qenë e para për ekipin mitrovicas në histori në “Shahin Haxhiislami” ka deklaruar se duhet të kenë kujdes nga euforia.

“U përballën dy ekipet më të mira të stinorit pranveror, shpresoj që shikuesit janë kënaqur me atë që panë sot në fushë. Falë portierit Bledar Hajdini kemi rezistuar në pjesë të parë, ndërsa tash pas fitores duhet të mbetemi me këmbë në tokë dhe nuk bën të jemi euforik. Euforia është armiku më i madh i yni në këtë moment,” ka thënë ndër të tjera Ramadani.

Trepça’89 me fitore ndaj Besës së mysafir ka vazhduar të mbajë epitetin e liderit në Superligë me dallim të njejtë pikësh nga xhiroja e kaluar për ndjekësin më të afërt, 6.