Finalisti i parë, Bashkimi

Me fitore edhe në ndeshjen e tretë të serisë gjysmëfinale, Bashkimi ka arritur të shkruajë emrin e ekipit në finale të PlayOffit të Superligës së Kosovës.

Pas dy fitoreve në Sezai Surroi, Bashkimi pa shumë telashe ka kaluar edhe në ndeshjen e tretë të serisë të zhvilluar në Shani Nushi të Gjakovës, ku Rahoveci luan si vendas dhe me rezultat 106-91 ka bërë serinë 3-0 për të arritur finalen.

PERFORMANCAT INDIVIDUALE

Mikaile Tmusic ka qenë më efikasi te Bashkimi, duke shënuar 32 pikë në fitore dhe duke regjistruar 3 topa të vjedhur, ndërsa ka shënuar 7 prej 12 tentimeve për tre pikë.

21 pikë të tjera dhe 18 kërcime ka shënuar Eric Stutz, ndërsa me 16 pikë e 10 kërcime ka përfunduar ndeshjen Aaron Moss - që të dy duke kryer takimin me double-double.

PLAYOFF SKEMA

Rahoveci përkundër insistimit për të arritur një fitore në PlayOffin historik për ta, nuk ka arritur më shumë në përballjen ku me 19 pikë më efikasi në ekipin e vreshtarëve ka qenë Muhamed Hasani.

Mark Williams ka shënuar 15, ndërsa 12 të tjera Arti Hajdari, në atë që doli të jetë ndeshja e fundit për këtë stinor për ekipin rahovecian, që arriti sukses historik duke përfunduar i treti në stinor të rregullt dhe duke arritur për herë të parë në histori të klubit PlayOffin.

FINALJA E TRETË

Sa i përket Bashkimit, kjo është finalja e tretë për ekipin e Dragan Radovicit këtë vit. Dy finalet e mëparme, Bashkimi i ka humbur, atë të Kupës së Kosovës dhe të BIBL.

Në finale Bashkimi pret fituesin e përballjes Ylli - Prishtina, ku bardhekaltërit kampionë janë në epërsi 2-0 në seri.