Finalistja e parë, Lituania

Kroacia, e cila erdhi në gjysmëfinale me tetë fitore radhazi, u ndalë nga Lituania. 

Loja e shpejtë e lituanezëve, ndikoi shumë, ku në çerekun e tretë e krijuan një epërsi të rehatshme.

Epërsia e krijuar lituaneze ndikoi negativisht tek kroatët, të cilët nxitonin për të shënuar, por saktësia e gjuajtjeve nga vija e treshit ishte katastrofale.

Nxënësit e Jasmin Repesës shënuan vetëm tre herë nga 20 tentime, me saktësi 15% që çoi në humbje të sigurtë Kroacinë.

Sidoqoftë, tek Lituania shkëlqyen lojtarët si Jonas Maciulis me 23, Linas Kleiza 22 dhe Mantas Kalnietis me 18 pikë. Te kroatët përsëri më i miri në skenë ishte Bojan Bogdanovic me 15 pikë, të cilat nuk mjaftuan për fitoren e radhës.

Lituania në finale do të përballet me fituesin nga dueli Spanja-Franca, ndërsa Kroacia do të luftojë për medaljen e bronztë me humbësin e po të njejtit duel.