Fitorja e tretë rresht për Prishtinën

Skuadra e Prishtinës po vazhdon me formë të mirë nën udhëheqjen e trajnerit Arsim Thaqi.

Ekipi nga kryeqyteti ka shënuar fitoren e tretë rresht në Superligë, duke e mposhtur kësaj radhe skuadrën e Trepçës me rezultat 2-1.

Ndeshja pati tri penallti, dy prej të cilave u shndërruan në gol.

Së pari Prishtina e fitoi penalltinë në minutën 26’, ndërsa nga pika e bardhë i saktë doli të jetë Liridon Leci.

Vetëm katër minuta më vonë gjyqtari përsëri akordoi për penallti, por kësaj radhe në të mirë të Trepçës. I saktë nga penalltia ishte Amir Prishtina, i cili e barazoi rezultatin në 1-1.

Në pjesën e dytë, përkatësisht në minutën 50’, Prishtina fitoi edhe penalltinë e dytë, mirëpo realizatori i golit të parë, Liridon Leci, kësaj radhe gjuajti plogësht dhe goditjen e tij e ndali portieri Petrit Tahiri.

Megjithatë, deri në fund të ndeshjes Prishtina arriti ta gjej golin e fitores, falë Mërgim Pefqelit, i cili shënoi në minutën 71’.

TABELA AKTUALE

Me këtë fitore Prishtina i afrohet për një pikë vendit të dytë, të cilin vazhdon ta mbajë Feronikeli, derisa Trepça e pësoi humbjen e 15-të dhe i vështirësoi akoma më shumë punët për t’i shpëtuar rënies.