Hidhet shorti i Superligës

Sot në zyret e Federatës së Basketbollit të Kosovës u bë tërheqja e shortit për stinorin e ri garues 2015/16 të Superligës së Kosovës.

Ngjashëm sikur në edicionin e kaluar, edhe sivjet në xhiron e parë do të zhvillohet dueli në Suharekë ndërmjet Golden Eagle Yllit dhe Bashkimit, derisa kampionja aktuale, Sigal Prishtina, pritet të ketë punë të lehtë në Ferizaj, ku e pret skuadra e Kastriotit.

Punë të lehtë mund të ketë edhe Peja, që do të jetë mysafire e Vëllaznimit, kurse skuadra e Trepçës do të përballet me debutuesit në Superligë, Kerasan Prishtinën.

Në javën e dytë do të ketë dy derbi, ku do të takohen Bashkimi - Peja dhe Sigal Prishtina - Trepça, derisa derbi kryesor Sigal Prishtina - Peja do të zhvillohet në javën e katërt.

Superliga do të fillojë nga datat 03/04 tetor.