Hungaria U16, shumë e fortë për Kosovën U16

Përfaqësuesja e Kosovës U16 është mposhtur nga Hungaria U16 sot në Sofje të Bullgarisë.

Djelmoshat e Kosovës janë mposhtur me rezultat të thellë, 46-80, derisa hungarezët kanë pasur avantazh gjatë gjithë ndeshjes.

Dyshja Dardan Kapiti dhe Andi Vrapçani përsëri kanë qenë më të dalluarit në ekipin që drejtohet nga Chris Dial e Edin Kërveshi.

Kapiti mbylli ndeshjen me double-double prej 15 pikëve dhe 10 kërcimeve, ndërsa Vrapçani me 8 pikë e 14 kërcime.

Me këtë disfatë, Kosova përmbyll europianin e Divisionit B për këto grupmosha në vend të 14-të nga 24 vende pjesëmarrëse.

Sllovenia, që ka qenë rivale e Grupit C me Kosovën, ka siguruar divisionin A për europianin e radhës, pasi që ka përfunduar e treta në këtë europian të divisionit B, duke e mposhtur Ukrainën, që gjithashtu ka qenë në grup me Kosovën.

Dy skuadrat finaliste, Rusia dhe Izraeli, gjithashtu kanë siguruar divisionin A.