I duhen dy përforcime

Përkundër se Sigal Prishtina regjistroi vetëm dy humbje në stinorin e rregullt të ligës ballkanike, ata mendojnë që të përforcohen gjatë pushimit dimëror. 

Së paku sinjale të tilla ka dhënë trajneri i ekipit Sabit Hadzic, i cili ka bërë të ditur pas ndeshjes së djeshme se pozita 2-3 dhe 4-5 duhet të forcohet ende në ekip. 

“Kemi luajtur dobët në mbrojtje dhe kjo na ka kushtuar. Mornari e shfrytëzoi këtë më së miri dhe fitoi. Shpresojmë të jemi më të mirë Vitin tjetër. Na duhen përforcime për pozitat 2-3 dhe 4-5 ashtu që të bëhemi edhe më të fortë për të gjitha sfidat që na presin si në ligë ashtu edhe në BIBL,” është cituar të ketë thënë Hadzic pas ndeshjes, raporton faqja zyrtare e Balkan League. 

Sigal Prishtina në përgjithësi është duke e përjetuar vitin më të mirë të viteve të fundit. Ata kanë fituar gjithçka në Kosovë, ndërsa në vitin e debutimit në BIBL kanë arritur Final Fourin. Këtë stinor, Sigal Prishtina ka regjistruar tre humbje në të gjitha garat, një në ligë dhe 2 në BIBL.