I kemi edhe pesë finale të tjera!

Trajneri turk i Sigal Prishtinës, Ceyhun Cabadak, pas fitores së madhe ndaj Galil Gilboas, ka filluar menjëherë të mendojë për ndeshjet e radhës në Balkan League.

Në një deklratë pas ndeshjes, Cabadak tha: “Të mos harrojmë se ne kemi edhe 5 lojë të tjera të cilat janë si 5 finale. Kjo është fitorja jonë e shtatë dhe synimi ynë ende mbetet që të mbledhim sa më shumë fitore dhe të luajmë në Final Four,” shkruan faqja zyrtare e klubit prishtinas.

Ai gjithashtu u ndal edhe te tifozët e flaktë të Sigal Prishtinës, Plisat, duke ia dedikuar fitoren e sontme këtyre të fundit.

“E kam një mesazh për tifozët tanë, Plisat. Kjo është loja e dytë me radhë që salla po stërmbushet. Atmosfera e cila po krijohet në sallë nuk ndodhë në asnjë sallë të ekipeve që luajnë në BIBL. Kjo fitore i dedikohet Plisave,” ka thënë Cabadak.

Sigal Prishtina me fitoren e sontme që e shënoi me rezultat të ngushtë 81-78, është ngritur në krye të tabelës në Balkan League, duke pasur pikë të njëjta (18) me ekipin bullgar, Levski, i cili sonte pësoi debakël nga skuadra e Pejës.