Ish ylli i Trepçës, te Peja

Pas largimit të Samir Shaptahovicit nga ekipi për shkak të arsyeve tashmë të njohura, Peja ka bërë goditjen e radhës në tregun basketbollistik. 

Nënkampionja aktuale e Kosovës ka sjellë në radhët e saja ish yllin e Trepçës, Jaleel Nelson, i cili kishte fituar titullin kampion me ekipin mitrovicas në stinorin 2011/12.

Njoftimin e ka bërë të ditur Federata e Basketbollit të Kosovës, që ka pranuar kërkesën për regjistrim të amerikanit në fjalë te ekipi pejan. 

Nelson gjatë stinorit 2011/12 kishte qenë i pakapshëm në basketbollin kosovar që bashkë me Drilon Hajrizin, si basketbollistë kryesorë të skuadrës ia kishin dhënë gëzimin e madh qytetit të Mitrovicës. 

Fundori 28 vjeç, pas largimit nga Trepça ka vazhduar karrierën e tij në Kili dhe Uruguaj, duke luajtur për ekipet Castro dhe Bohemios, përkatësisht. 

Me ekipin kilian Castro, ai kishte arritur mesatare prej 26.1 pikësh për ndeshje, 2.3 asistime dhe 7.6 kërcime. 

Ndërsa në Uruguaj ai kishte arritur këtë mesatare me Bohemiosin: 17.6 pikë për ndeshje, 3.2 asistime dhe 6.4 kërcime, gjatë stinorit ku kishte luajtur 38 ndeshje për këtë ekip. 

Së fundi vitin 2014 Nelson e përfundoi te Jacksonville Giants në SHBA, në ABA League. 

Nelson përveç titullit kampion me Trepçën, atë vit (2012) kishte fituar edhe Kupën e Kosovës duke e mposhtur Bashkimin në finale, ndërsa ka qenë pjesë e ndeshjes All Star gjithashtu, që ishte mbajtur në Suharekë.

Video

Jaleel Nelson duke ngulitur te Trepça

Një kundërsulm i shpejtë i Trepçës në vitin 2012 ndaj Pejës, ku Jaleel Nelson përfundon akcionin me ngulitje monstruoze

Akcionet e Jaleel Nelson te Trepça

Disa nga akcionet e mitrovicasve gjatë stinorit 2011/12, me pjesëmarrje të Jaleel Nelsonit në 'te. Fitues i trofeut të Kupës së Kosovës dhe titullit kampion me Trepçën, kthehet pas dy stinorëve e gjysëm në Superligën kosovare të basketbollit, te Peja.