VËLLAZNIMI
Foto: Dion Gjoka/ KB Vëllaznimi
Brooks kthehet, e do Play-Offin
22 January, 2015 @21:43
Fundori amerikan, Phil Brooks, është rikthyer te ekipi i tij Vëllaznimi sot. Basketbollisti amerikan me përvojë, 29 vjeçari Brooks, në një prononcim për Borozani.com ka bërë të ditur se është në Gjakovë për t’ia sjellë Vëllaznimit Play-Offin.
“Ne do të mundohemi që të arrijmë Play-Offin këtë stinor. Do të japim gjithçka nga vetja, çdo natë që shkelim në palestër,” ka thënë fundori që luajti 4 ndeshje gjatë vjeshtës me kuqezinjtë.
“Dua t’i ndihmojë këtij qyteti që të arrijë për herë të parë Play-Offin,” ka shtuar në fund Brooks.
Brooks që ka qenë në Kosovë edhe disa stinorë më parë kur derdhi djersë për Bashkimin, në katër ndeshjet e zhvilluara me Vëllaznimin gjatë vjeshtës ka pasur mesatare prej 18.8 pikëve, 2.3 kërcimeve dhe 5.8 asistimeve për ndeshje.
Vëllaznimi gjatë afatit kalimtar kishte paralajmëruar si përforcim Spencer Dixonin e Bashkimit, mirëpo pasi që ky i fundit vendosi të shkonte në Mal të Zi të luaj me ekipin e Ibrit nga Rozhaja, gjakovarët kthyen Brooksin, që ka më shumë përvojë në basketbollin kosovar.
Vëllaznimi ka përfunduar pjesën e parë të stinorit me bilanc prej 5 fitoreve e 9 humbjeve, derisa është renditur në pozitën e gjashtë pas Yllit të Suharekës, që gjithashtu ka bilanc të njejtë.
