Italia e mrekullueshme

Italia është lidere e grupit D dhe njëkohësisht ekipi i vetëm i pamposhtur në këtë grup.

Përfaqësuesi i Gadishullit Apenin e mposht Greqinë me rezultat 72-81, duke ia shkaktuar humbjen e parë në këtë kampionat.

Ylli i San Antonio Spurs, Marco Belinelli, kishte paraqitje të shkëlqyeshme në këtë ndeshje. Ai luajti me 23 pikë, 7 kërcime e 3 asistime, derisa u ndihmua edhe nga Luigi Datome që e përmbylli takimin me 19 pikë.

Lojtari kryesor i grekëve, Vassilis Spanoulis, sikurse kundër Turqisë, as në këtë ndeshje nuk luajti fare për shkak të lëndimit. Mungesën e tij u mundua ta mbulojë Nikos Zisis, i cili realizoi 16 pikë, 3 kërcime dhe 4 asistime.

Serbia i kthehet fitoreve

Pas humbjes ndaj Maqedonisë, përfaqësuesja e Serbisë i është kthyer fitoreve, pasi e mposhti Letoninë me rezultat 80-71.

Qendra serbe, Nenad Krstic, ishte i pandalshëm nën kosh. Ai ishte gjithashtu edhe koshashënuesi më i mirë i takimit me 25 pikë, derisa tek letonezët më i miri ishte Kristaps Janicenokos që realizoi 18 pikë.

Ukrainën e ndal Franca

Skuadra e pamposhtur e grupit A, Ukraina, është njoftuar me humbjen. Ajo u mposht nga Franca me rezultat 71-77, megjithëse në çerekun e katërt skuadrat hynë me rezultat të barabartë 51-51.

Toni Parker shkëlqeu në ndeshje, pasi realizoi plot 28 pikë.

Në anën tjetër, tek urainasit më i miri ishte plejmekeri Eugene Jeter me 20 pikë e 6 kërcime, por atij i mungoi ndihma e bashkëlojtarëve, pasi që ishte i vetmi te Ukraina me pikë dyshifrore.

Çekia, më lehtë se që pritej

Republika e Çekisë ka shënuar fitoren e dytë në grupin C. Ajo e mposhti rivalin e drejtpërdrejtë, Gjeorgjinë, me epërsi prej 16 pikëve, 95-79.

Në fitoren e cila ishte shumë më e lehtë se që pritej, u dallua Jan Vesely, i cili luajti me double-double, me 27 pikë dhe 10 kërcime.

Në anën tjetër, dyshja gjeorgjiane, George Tsintsadze dhe Manuchar Markoishvili, luajtën me nga 20 pikë secili, mirëpo humbja ishte e pashmangshme për ekipin e tyre.

Rezultatet e ndeshjeve