Kapitenia e Penzës: Duam ta fitojmë Superkupën

Superkupa e Femrave në basketbollin kosovar do të organizohet në Karagaç të Pejës, ndërsa kapitenia e skuadrës pejane Penza, Valbona Bytyqi duke folur për faqen zyrtare të FBK-së ka bërë të ditur se ato dëshirojnë që trofeun ta mbajnë aty.

Superkupa e Femrave është përcaktuar të mbahet në datat 4 dhe 5 tetor 2021 në Karagaç të Pejës, ku do të garojnë katër skuadrat më të mira të basketbollit të femrave të Kosovës.

“Përgatitjet kanë shkuar shumë mirë, ndërsa me ardhjen e trajnerit Bujar Loci dhe përforcimet, kemi bërë punë të mirë si ekip,” ka thënë Bytyqi fillimisht.

Ndërsa ajo ka theksuar se Superkupën dëshirojnë ta mbajnë në Pejë, por edhe pa harruar Ligën Unike të femrave, ku dëshirojnë të prezantojnë qytetin sa më mirë.

“Synimet tona si gjithmonë janë të fitojmë. Së pari Superkupën e pastaj të përgatitemi edhe për kampionatin e Kosovës dhe të përfaqësojmë qytetin sa më mirë në Ligën Unike,” ka thënë ajo.

Kujtojmë, Bytyqi është njëra ndër basketbollistet më me përvojë në ligën e Kosovës në basketboll, ndërsa dueli gjysmëfinal i Superkupës mes Penzës e Vëllaznimit luhet më 4 tetor me fillim prej orës 16:00.

Në gjysmëfinalen tjetër do të ndeshen Prishtina e Bashkimi. Ndërsa finalja luhet më 5 tetor me fillim prej orës 19:00.