NEW BASKET - KERASAN PRISHTINA
Kerasan Prishtina pa humbje, New Basketi pa fitore
30 October, 2019 @22:12
Ndeshja hapëse e xhiros së tretë në Ligën e Parë të Kosovës në basketboll, në mes të New Basketit dhe Kerasan Prishtinës, përfundoi me rezultat 67-72 në favor të skuadrës prishtinase.
Epërsia e krijuar nga Kerasani në çerekun e dytë, i kushtoi me humbje New Basketit. Skuadra prizrenase në 10 minutëshin e dytë të ndeshjes shënoi vetëm 8 pikë, derisa i pranoi 27 pikë.
Endrit Berisha ishte më i dalluari te Kerasan Prishtina me 28 pikë, 5 kërcime e 3 asistime, derisa me nga 12 pikë luajtën edhe Rron Dahsyla dhe Eliot Peci.
Te skuara e New Basketit Lavdim Morina luajti me 20 pikë e 4 kërcime dhe Drini Rexha me double-double prej 15 pikëve e 12 kërcimeve.
Kerasan Prishtina nuk pësoi as në ndeshjen e tretë, derisa New Basketit nuk u njoftua me fitore ende.
Në xhiron tjetër, Kerasan Prishtina luan me AS Prishtinën, kurse New Basketi me Vëllaznimin.
