Këtë vit do të ketë Superkupë

Federata e Basketbollit të Kosovës (FBK) ka vendosur që këtë vit të luhet ndeshja e Superkupës së Kosovës.

Këtë FBK e ka shkruar në PG të stinorit 2018/19, ku qartazi thuhet:

“Para fillimit të edicionit 2018/19 do të zhvillohen ndeshjet e Superkupës së Kosovës ndërmjet fituesit të Kupës dhe kampionit nga edicioni i kaluar (2017/18) dhe atë në të dyja konkurrencat, meshkuj dhe femra.”

Fitues i titullit kampion në stinorin që e lamë pas te meshkujt është Bashkimi i Prizrenit, që po rikonsolidohet pas ndërrimit të kryesisë. Ndërsa fituese e Kupës nga stinori i kaluar është Sigal Prishtina.

Te femrat, titullin kampion e ka fituar ekipi i femrave të Bashkimit, ndërsa Kupën, Prishtina.

Stinorin e shkuar, ndeshjet e Superkupës nuk janë zhvilluar. Ndërsa sa i përket këtij stinori, është shkruar që ndeshjet në fjalë do të zhvillohen para fillimit të edicionit, por datë e saktë nuk është dhënë.

Zakonisht, ndeshjet e Superkupës janë zhvilluar një fundjavë para se të nis kampionati i ri i basketbollit.