Kosova, sukses më i madh i BIBL

Trajneri i Levskit të Sofjes, Konstantin Papazov, i cili sot do të udhëheq ekipin e tij në ndeshje kundër Sigal Prishtinës për kualifikim në TOP 2 të ligës ballkanike ka thurrë lëvdata për ekipet kosovare por edhe për trajnerin Marin Dokuzovski, të cilin e ka mik të vjetër. 

“Mendoj se vendimi më i mirë në histori të ligës ballkanike është vendimi për pranim të ekipeve kosovare në Balkan League, si dhe tejkalimi i kufinjëve politik për të fituar sporti,” ka thënë ai në një intervistë të shkurtër për faqen zyrtare të ligës ballkanike. 

Ai e ka vlerësuar mjaft shumë mikun e tij dhe kundërshtarin e tij të sotëm, Marin Dokuzovski që po udhëheq Sigal Prishtinën para ndeshjes që fillon tre orë më pas. 

“Ai ka qenë pjesë e disa nga sukseseve më të mëdha të mijat. Kam mësuar shumë nga ai, por ka marrë edhe ai diçka nga unë. Mirëpo, sonte s’do të ketë emocione. Sigurisht, ndeshja e sontme do të jetë finale para finales,” ka thënë Papazov. 

Sigal Prishtina dhe Levski Sofia luftojnë sonte për një vend që dërgon në TOP 2 të ligës ballkanike dhe mundëson kualifikimin direkt në Final Four. 

Të dyja skuadrat kanë pikë të njejta dhe fituesi do të kërcejë në vend të dytë.