FEDERATA
Krijohet Liga e Dytë
28 May, 2016 @16:05
Bordi i Federatës së Basketbollit të Kosovës (FBK) ka vendosur që të themelojë Ligën e Dytë të Kosovës në basketboll, që do të fillojë me gara që nga edicioni 2016/17.
Para fillimit të edicionit 2015/16 Bordi kishte vendosur që vetëm 8 ekipet me plasmanin më të mirë në Ligën e Parë do të vazhdojnë garat në këtë rang, kurse për ekipet tjera do të merret një vendim i veçantë.
“Duke pasur parasysh interesimin e madh për themelimin e klubeve të reja ose rikthimin në gara të klubeve që viteve të kaluara nuk kanë garuar, Bordi e ka parë të arsyeshme të rithemelojë Ligën e Dytë”, ka deklaruar sekretari i përgjithshëm i FBK-së Leart Hoxha.
Iniciativa për themelimin e klubeve të reja ose inkuadrim në gara të klubeve nga komunat që më herët kanë qenë pjesë e ligave të basketbollit kohëve të fundit ka pasur nga shumë vise të Kosovës dhe në varësi nga numri i klubeve që paraqiten për Ligën e Dytë, do të vendoset për sistemin e garave në këtë ligë.
